UPSC ಯ “ಐಚ್ಚಿಕ ಕನ್ನಡ ಸಾಹಿತ್ಯ” ತಯಾರಿ ಹೀಗಿರಲಿ

ಪೇಪರ್‌ 1 ಮತ್ತು ಪೇಪರ್‌ 2 ಗಳ ಕಳೆದ ಹತ್ತು ವರ್ಷಗಳ ಪ್ರಶ್ನೆ ಪತ್ರಿಕೆಯೊಂದಿಗೆ ನಮಗೆ ಇಟ್ಟಿರುವ ಪಠ್ಯಕ್ರಮವನ್ನು ವಿಶ್ಲೇಷಣೆ ಮಾಡುತ್ತಾ ಮತ್ತೆ ಹೊಸ ರೀತಿಯ ಓದನ್ನು ಇಲ್ಲಿ ಅನುಸರಿಬೇಕಾಗುತ್ತದೆ. ಪರೀಕ್ಷೆಯ ಬೇಡಿಕೆಯಂತೆ  ನಿಜವಾದ  ತಯಾರಿ ಪ್ರಾರಂಭವಾಗುವುದೇ ಈ ಎರಡನೇ ಹಂತದಲ್ಲಿ. ಉದಾ; ಪಂಪನನ್ನು ಓದುವಾಗ ಅವನ ಎರಡು ಕೃತಿಗಳಿಂದ ಇಲ್ಲಿವರೆಗೆ ಕೇಳಲಾದ ಪ್ರಶ್ನೆಗಳನ್ನು ನೋಡಬೇಕಾಗುತ್ತದೆ ತದನಂತರ ಕೇಳಿರುವ ಪ್ರಶ್ನೆಗಳಿಗೆ ಸಮರ್ಪಕವಾಗಿ ಉತ್ತರಿಸಲು ಬೇಕಾಗಿರುವ ಅಂಶಗಳನ್ನು ಆ ಕೃತಿಗಳಿಂದ ಹೆಕ್ಕಿ ತೆಗಿಯಬೇಕು. 

• ಪಂಪನ ಆದಿಪುರಾಣದ ಬಾಹುಬಲಿ ಸಂವಾದ(೧೦) 2018

• ವಿಕ್ರಮಾರ್ಜುನ ವಿಜಯದ ಕರ್ಣನ ಪಾತ್ರ ಚಿತ್ರಣ. 2022

• ಪಂಪಭಾರತದ ನಾಯಕ ಯಾರು? ಅವನ ಪಾತ್ರವನ್ನು ಕವಿ ಹೇಗೆ ಚಿತ್ರಿಸಿದ್ದಾನೆ ವಿವರಿಸಿರಿ. 2023

ಈ ರೀತಿಯ ಪ್ರಶ್ನೆಗಳನ್ನು ಪೇಪರ್‌ 1 ರಲ್ಲಿ ಪಂಪನಿಂದ ಕೇಳಿರುವುದರಿಂದ ಪ್ರಶ್ನೆಯ ಬೇಡಿಕೆಯನ್ನು ಮೊದಲು ತಿಳಿದಾಗ ಮತ್ತೊಮ್ಮೆ ಆದಿಪುರಾಣವನ್ನು ಓದುವಾಗ ಬಾಹುಬಲಿಯ ಸಂವಾದವನ್ನು ಸೂಕ್ಷ್ಮವಾಗಿ ಗ್ರಹಿಸಲು ಸಾಧ್ಯವಾಗುತ್ತೆ ಹಾಗೆಯೇ ವಿಕ್ರಮಾರ್ಜುನದ ಕರ್ಣನ ಪಾತ್ರವನ್ನು ಸಹ ಅಷ್ಟೇ ಪ್ರಾಮುಖ್ಯತೆಯನ್ನು ನೀಡಿ ಕಥೆಯಂತೆ ಓದದೆ ವಿಶ್ಲೇಷಣಾತ್ಮಕವಾಗಿ ಕರ್ಣನನ್ನು ಅಧ್ಯಯನ ಮಾಡಲು ಪ್ರಾರಂಭಿಸುತ್ತೇವೆ.

ಪ್ರಶ್ನೆಗಳಿಗೆ ಸಮರ್ಪಕವಾಗುವಂತಹ ಕಾವ್ಯದ ಸಾಲುಗಳನ್ನು ಈ ಸಂದರ್ಭದಲ್ಲಿ ಪಟ್ಟಿಮಾಡಿಕೊಳ್ಳಬಹುದು. 

ಪಂಪಭಾರತದಲ್ಲಿ:

• “ನೆನೆಯದಿರಣ್ಣ ಭಾರತದೊಳಿಂ ಪೆಱರಾರುಮನೊಂದೆ ಚಿತ್ತದಿಂ ….

       ಕರ್ಣನ ಚಾಗಮೆಂದು ಕರ್ಣನ ಪಡೆಮಾತಿನೊಳ್ ಪುದಿದು ಕರ್ಣ ರಸಾಯನಮಲ್ತೆ ಭಾರತಂ” 

• ಚಲದೊಳ್ ದುರ್ಯೋಧನಂ ನನ್ನಿಯೊಳಿನತನಯಂ ಗಂಡಿನೊಳ್ ಭೀಮಸೇನಂ……
• ಇದರೊಳ್ ಶ್ವೇತಾಪತ್ರಸ್ಥಗಿತ ದಶದಿಶಾಮಂಡಲಂ…….

     ಇದುವೆ ಮಹಾಭಾರತಕ್ಕಾದಿಯಾಯ್ತು ….ಭವತ್ಕೇಶಪಾಶಪ್ರಪಂಚಂ ||

ಆದಿಪುರಾಣದಲ್ಲಿ

• ನೀಲಾಂಜನೆ ಕರ್ಬಿನ ಬಿಲ್ಲಂ ಮಸೆದ ಮದನನಲರ್ಗಣೆ ಬರ್ದುಕಿ
  ತ್ತೆನಿಸುತ್ತೊಳಪೊಕ್ಕಳ್ ಭೋಂಕನೆ ನಿಖಿಲಜನಾಂತರಂಗಮಂ ರಂಗಮುಮಂ |
• ನಾರೀರೂಪದ ಯಂತ್ರಂ ಚಾರುತರಂ ನೋಡೆನೋಡೆ ಕರಗಿದುದೀ…
• ಸೋದರರೊಳ್ ಸೋದರರಂ
  ಕಾದಿಸುವುದು ಸುತನ ತಂದೆಯೆಡೆಯೊಳ್ ಬಿಡದು
  ತ್ಪಾದಿಸುವುದು ಕೋಪಮನ್ ಅಳ
  ವೀ ದೊರತೆನೆ ತೊಡರ್ವುದೆಂತು ರಾಜ್ಯಶ್ರೀಯೊಳ್….

‘ನೆಲಸುಗೆ ನಿನ್ನ ವೃಕ್ಷದೊಳ್ ನಿಶ್ಚಲಮಾ ರಾಜ್ಯಲಕ್ಷ್ಮಿ,’

‘ಭೂವಲಯಮನಯ್ಯನಿತ್ತುದಮಾಂ ನಿನಗಿತ್ತೆಂ ನೀನೊಲಿದ ಲತಾಂಗಿಗಂ ಧರೆಗಮಾಟಿಸಿದಂದು ನೆಗೞ್ತೆ ಮಾಸದೇ’ 

ಪ್ರತಿ ಕೃತಿಯನ್ನು ಓದುವಾಗ ಈ ರೀತಿಯ ಪ್ರಮುಖವಾದ ಸಾಲುಗಳನ್ನು ಗುರುತಿಸಿ ಅದರ ಕುರಿತು ಟಿಪ್ಪಣಿಮಾಡಿಕೊಳ್ಳಿ ಊಟಕ್ಕೆ ಉಪ್ಪಿನಕಾಯಿಯಂತೆ ಅವಶ್ಯವಿರುವ ಕಡೆಯೆಲ್ಲಾ ಕಾವ್ಯದ ಸಾಲುಗಳನ್ನು ಉತ್ತರಗಳಲ್ಲಿ ಉಲ್ಲೇಖಿಸಿದರೆ ನಿಮ್ಮ ಉತ್ತರದ ಗುಣಮಟ್ಟವು ಇನ್ನಷ್ಟು ಹೆಚ್ಚಿಸುತ್ತದೆ. 

ಜೊತೆಯಲ್ಲಿ ಹೆಚ್ಚಿನ ವಿಮರ್ಶಾ ಲೇಖನಗಳನ್ನು ಓದಿ ಅದರಿಂದ ಆ ಕೃತಿಯನ್ನು ಓದುವ ಮತ್ತು ತಿಳಿಯುವ ಆಯಾಮವು ಇನ್ನಷ್ಟು ವಿಸ್ತಾರವಾಗುತ್ತಾ ಹೋಗುತ್ತೆ. ʻಸಾಮಾನ್ಯನಿಗೆ ಸಾಹಿತ್ಯ ಚರಿತ್ರೆʼಗಳ ಪುಸ್ತಕಗಳನ್ನು ಈ ಸಂದರ್ಭದಲ್ಲಿ ರೇಫರ್‌ ಮಾಡಿದರೆ ಉತ್ತಮ, ಹಾಗೆಯೇ, ದೇವನೂರ ಮಹಾದೇವ ಅವರ ʻಒಡಲಾಳʼ ಕೃತಿಯನ್ನು ಓದಿದ ನಂತರ “ಯಾರ ಜಪ್ತಿಗೂ ಸಿಗದ ನವಿಲುಗಳು” ಎಂಬ ವಿಮರ್ಶಾ ಕೃತಿಯನ್ನು ಓದಿ, ಇಲ್ಲವಾದರೆ “ನಮ್ಮ ಬನವಾಸಿ” ಎಂಬ ವೆಬ್‌ಸೈಟ್‌ ಲ್ಲಿ ದೇವನೂರು ಮಹಾದೇವರ ಕೃತಿಗಳ ಅಂಶಗಳನ್ನು ಅಲ್ಲಿಂದ ಪಡೆಯಬಹುದು.

ಗಿರೀಶ್‌ ಕಾರ್ನಾಡ್‌ ರವರ ʻತುಘಲಕ್‌ʼ ನಾಟಕ ಓದಿದ ನಂತರ ಕೃಷ್ಣಮೂರ್ತಿ ಚಂದರ್‌ ಅವರು ಸಂಪಾದಿಸಿರುವ “ಗಿರೀಶ್‌ ಕಾರ್ನಾಡರ ನಾಟಕಗಳು” ಎಂಬ ವಿಮರ್ಶೆ ಕೃತಿಯ ಆಯ್ದ ಲೇಖನಗಳನ್ನು ಓದಿ ಟಿಪ್ಪಣಿ ಮಾಡಿಕೊಳ್ಳಬಹುದು. ಪ್ರತಿಯೊಂದು ಕೃತಿಗೂ ವಿಮರ್ಶೆ ಲೇಖನಗಳು ವಿಪುಲವಾಗಿ ದೊರೆಯುತ್ತವೆ ಆದರೆ ಅವುಗಳನ್ನು ಹೆಕ್ಕಿತಂದು ಒಂದೆಡೆ ಸೇರಿಸುವುದು ಸುಲಭವಲ್ಲ. ಪ್ರತಿಯೊಂದು ವಿಷಯಕ್ಕೂ ಸಮಾನವಾದ ಒತ್ತನ್ನು ನೀಡಬೇಕಾಗುತ್ತದೆ, ಯಾಕೆಂದರೆ ಎಲ್ಲಾ ಪಠ್ಯಗಳಿಂದ ಒಂದಲ್ಲಾ ಒಂದು ಪ್ರಶ್ನೆಯು ಬಂದೆ ಬರುತ್ತೆ. ಹಾಗಾಗಿ ಎರಡನೇ ಹಂತದ ತಯಾರಿಯು ಎಷ್ಟರಮಟ್ಟಿಗೆ ಪರಿಣಾಮಕಾರಿಯಾಗಿ ಇರುತ್ತೋ ಅದರ ಫಲಿತಾಂಶವು ಮೂರನೇ ಹಂತದಲ್ಲಿ ತಿಳಿಯುತ್ತೆ.